Erkiteken Keleng Ate-Na Kita Jadi Anak-anak-Na

 

Sermon Bahan PJJ 25 April – 1 Mei 2021

GBKP Rg. Bambu Raya Klasis Medan Delitua

Nats            : Epesus 1:3-6

Tema          : Erkiteken Keleng Ate-Na Kita Jadi Anak-anak-Na

  (identitas kalak si tek)

 

I.                   Kata Penaruh

Lit sada film action judulna “Who Am I” sinuriken sekalak si lanai ingetna ise ia erkiteken sada kecelakaan ibas tugasna. Simenarik ibas sie eme perjuangen aktor e guna ndatken ras meteh ise situhuna ia, erbage upaya ibahanna gelah banci ietehna ise ia. Bagem ergana identitas ibas kegeluhen enda guna meteh ras nandai ise situhuna kita. Ibas sieteh ras sitandai ise kita maka arusna sidalani kegeluhenta sue ras identitasta. Bahan PJJ sekalenda ngingetken kita kerna ergana identitasta selaku kalak sierkiniteken, sijadi sikerajangen Dibata si arusna ncidahken identitas e ibas perdalanen kegeluhenta.

Sienda tentu perlu kel siertiken alu payo segelah reh semangatna kita guna ncidahken keberadanta selaku anak Dibata (Identitas Kalak Si Tek). Tergejap man banta ibas kinata kegeluhen ibas jamanta gundari megati kel identitas Kristen e enggo samar (bagi lanai teridah), gia melala singelakoken peribadahan tapi ibas praktek nggeluh lanai teridah tandana kita kalak sierkiniteken. Iarapken maka ibas kita ngorati bahan PJJ Minggu enda reh teridahna min kwalitasta selaku anak Dibata alu ncidahken identitas selaku anak Dibata ibas kerina situasi kegeluhen enda.

 

II.                Mpebagesi Pengangkan Kerna Ogen

 

Epesus e me salah sada surat si itulisken Paulus. I bas kitab enda ituriken kuga Dibata enggo mpekeke Kristus, si genduari merentah ras Dibata i Surga. Kitab enda pe mperlihatken kuga Kristus enggo mpersadaken kalak Jahudi ras kalak si labo Jahudi alu merobohken tembok pemisah, e me perseteruan (2:14). Ia si enggo erkiniteken man Jesus enggo i pilih Kesah Sibadia guna jadi bagin i bas sada kula, e me perpulungen. Kula enda memiliki “ sada Dibata, sada kiniteken, bagepe sada baptisen” (4:5). Kristus enggo memilih erbage kalak i bas perpulungen guna ngaloken pemere-pemere si erbage-bage, seperti para rasul, nabi pemberita Injil, para gembala umat, ras pengajar (4:11). Dua setengah pasal terakhir i bas kitab enda mereken petunjuk guna nggeluh selaku anak Dibata, termasuk pe “senjata” rohani si ibereken Dibata gelah perpulungen-Na banci ertahan ngelawan Iblis ras penguasa-penguasa kegelapen (6:10-17).

Epesus 1:3-6, ngerana kerna Pemasu-masun Dibata arah Jesus Kristus, adi i bas bahasa Indonesiana nina Kekayaan orang-orang yang Terpilih. Kai nge ndia ndeba pemasu-masun Dibata arah Jesus Kristus..?

ü  Ayat 3 : Enggo i pasu-pasuNa kita , alu erbage-bage pemere pertendin si lit i bas ingan si meganjang (berkat rohani). Erbage-bage pemere pertendin si i bereken man Dibata e me, pengalemi dosa si enggo i bereken Dibata arah Jesus Kristus (1:7-8), kepentaren, kepentaren i bereken Dibata man banta gelahna banci si tandai Dibata alu tangkas (1:17), kiniteken - lias ate Dibata, Dibata pe mereken kita keterkelinen arah kinitekennta man baNa. Labo erkiteken gegeh kengasupennta, tapi erkiteken lias ate-Na (2:8), erbage-bage pemere, Dibata mereken erbage-bage pemere man banta, janah pemere si ibereken Dibata e i pakeken kita guna ngelai Dibata (4:11-2).

ü  Ay. 4-5 : Dibata enggo milih kita “ Predestinasi : keputusan Allah yang kekal yang dengannya Ia menetapkan untuk diriNya sendiri, apa yang menerut kehendakNya akan terjadi atas setiap orang. Dalam ajaran ini dijelaskan bahwa orang percaya hanya diselematkan kerena mereka dipilih oleh Allah unutk diberi keselamatan” ope denga ijadiken Dibata doni enda, enggo ipilihNa kita jadi sikerajangen-Na arah persadanta ras Kristus gelah kita badia dingen la ersalah i lebe-lebe-Na. Enda nuduhkenca man banta maka maka Kristus e me Kata e. Kata e ras Dibata, janah Kata e Dibata. Mula-mulana nari Kata e ras Dibata. Arah Kata e i jadiken Dibata kerina sinasalit (Joh. 1:1-3). Enda berarti, bahwa tupung Kristus milih kalak guna jadi anggota keluarga Dibata, enda merupaken bagin arah rencana Dibata mula-mulana nari.

ü  Ay. 6 : Terpuji Dibata, i bas kerina si enggo i bereken Dibata nadangi kita. Kita enggo i pasu-pasuNa, enggo iberekenNa man banta erbage-bage pemere pertendin, janah kita enggo i pilihNa jadi sikerajangenNa gelah kita badia dingen la ersalah. Si enda kerina erkiteken keleng ate-Na man banta. Emaka patut me si puji Dibata, patut me si permuliaken Dibata.

Arah bahan enda banci siidah maka selaku kalak sierkiniteken maka identitas e nggo melekat ibas kita. Identitas kalak Kristen labo man buninken tapi perlu icidahken alu kegeluhen uga kin arusna kita selaku kalak sierkiniteken e. Guna sie perlu sirenungken maka :

1.    Identitas kalak Kristen silit ibas kita eme pemere Dibata si arus sijaga ibas kegeluhenta, ertina tetap arus lit perjuangen guna mpertahankensa.

2.    Identitas e arus sicidahken arah perbahanen geluhta guna banci itandai kalak sideban ise kita. Ertina terang min penandai kalak kerna keberadanta selaku kalak si tek man Kristus.

3.    Ncidahken identitas kalak Kristen ertina ncidahken kemulian Tuhan arah kegeluhenta. Jadi perlu tetap setia kutera kai pe siman alanken kemulian Tuhan arah kita arus terus teridah ibas kegeluhen enda.

 

III.             Pengkenaina

 

Identitas Kalak si tek arus ncidahen arah orat geluhna selaku kalak si enggo iselamatken, sebab erkiteken keleng ate-Na kita nggo jadi anak-anak-Na. Nina Jakub. “Bage me pe kerna kiniteken. Adi kiniteken sue labo rikut ras perbahanen, kiniteken si bage mate kap,”(Jakub 2:17) . Perbahanen eme buah kiniteken nandangi kalak si bujur man DIbata si enggo merekan keselamaten nandangi kalak si erkiniteken. Johanes Calvin ngajarken teologina kerna predestinasi ertina Dibata nge si netapken ras sinelamatken manusia si perdosa. Si jadi tanda kalak si nggo iselamatkan eme teridah arah orat geluhna tep-tep wari . Orat gelu kalak si enggo iselamatken eme kerinana rama pujin ras guna kemulian Diabata saja ( Soli deo Gloria) . Kalak si enggo iselamatkan enggo ipelimbarui i bas Jesus Kristus.

Arah si e secara praktis arus sicidahken sie kerina alu :

ü  Litna perubahen perbahanenta ibas kegeluhen enda : sindube la mehuli salih jadi mehuli, sebab si ieteh kalak maka Kristus, pengajarenNa e ncidahken simehuli. Ula min erkiteken perbahanen kalak kristen justru tercurna gelar Dibata.

ü   Perdalanen nggeluh si ngasup ngkuasai diri, bujur nggeluh. Ertina identitasta e arus teridah gia banci jadi sekelewetta la mehuli, la bujur rsd, tapi kalak Kristen arus pang naksiken dirina selaku kalak si “berani tampil beda”.

ü  Nembah Dibata ibas kesetiaan ras ketutusen arus teridah arah nggeluh bersih ras lalap mesikel erbahan simehuli. Kalak Kristen arus lalap nuduhken simehuli ibas geluh enda, gia banci jadi la akap doni enda payo, tapi ingetlah, maka Dibata payo akapNa adi anak-anakNa ncidahken simehuli ibas kegeluhen enda.

Enda me bagin siarus terus silakoken selaku anak Dibata guna ncidahken ise kita selaku anak-anak-Na si erkiniteken man BaNa. Simbol-simbol labo jadi hal siutama guna ncidahken identitas, siperlu teridah eme uga iidah kalak, ernanam akap kalak kerna keberadanta selaku sikerajangen Dibata.

 

 

Vic. Anggianita Br Sembiring