Pehagalah Kristus Selaku Tuhan

 

Sermon Bahan PJJ 09 – 15 Mei 2021

GBKP Rg. Bambu Raya Klasis Medan Delitua

Nats                : 1 Petrus 3:14-22

Tema              : Pehagalah Kristus Selaku Tuhan

  (Pasion, Jumat Agung, Paskah, Kenangkihen Tuhan Jesus ku Surga)        

I.         Kata Penaruh

Minggu-minggu Passion, Jumat Agung, Paskah, seh ku minggu Kenangkihen Tuhan Yesus ku Surga eme gambaren perdalanen Yesus paksa Ia nggeluh ibas doni enda jadi manusia ija Ia mate I kayu Persilang, tapi keke ibas wari sipeteluken, naluken kuasa dosa,  jenari nangkih Ia ku Surga. Kenangkihen Jesus e jadi jaminen man banta, maka kita si tek man Jesus lanai ikuasai kematen, janah ibas paksana pepagi, bengket me kita ku Surga, eme ingan si enggo isikapken Dibata genduari nari man banta. Arah si e patut me kita selaku kalak Kristen si tek man Yesus Kristus harus Mpehaya Kristus e selaku Tuhan.

II.      Mpebagesi Pengangkan Kerna Ogen

Surat Petrus si Pemena i alamatken man kalak Kristen si merap i belang-belang bagin Utara Asia Kitik (lima daerah si i sebutken i bas surat enda e me: Pontus, Galati, Kapadokia, Asia ras Bitinia). I bas surat enda kalak Kristen i gelari “Bangsa Pilihen Dibata”. Penulis surat enda nuriken kerna pentingna kematen bagepe kekeken Jesus Kristus. Pengajaren Jesus kerna kiniteken, kiniteruken ukur, bagepe keriahen ukur i bas ngalaken percuban i munculken i bas surat enda, janah tujun surat enda eme guna mpegegehi ukur si ngogesa, si sangana iayak-ayak dingen ngenanami kiniseran erkiteken kinitekenna man Jesus, bagi bahan oraten PJJ-nta sendah. Ija ikataken ibas :

ü  Ayat 14-17 : “Malem me ate ngalaken kiniseran erkiteken Jesus Kristus”

Kerina manusia i babo pertibi enda, pasti pernah ngenanami kiniseran i bas geluhna. Kiniseran si i nanami manusia, erbage-bage janah sigejap-gejapen ka ia. Mungkin kiniseran si i nanami kita mberat si akap, tapi akap kalak beraten kiniseran si i nanami. Si enda tergantung kuga cara pikirta i bas ngalaken kiniseran. I bas ngalaken kiniseran, jarang tuhu jelma si malem atena i bas kiniseran si reh nderpa kegeluhenna. Tapi selaku kalak Kristen si erkiniteken nandangi Dibata, maka i bas kita ngalaken kiniseran e erkiteken ndalanken si mehuli, malem me ate janah ola aru ate, ula mbiar ancamen kalak. Tapi i bas kiniseran e, mehamatlah nandangi Kristus i bas pusuhta, janah arus si pehaga Ia selaku Tuhan. Pehagaken Kristus selaku Tuhan i bas ngalaken kiniseran erkiteken perbahanen si mehuli, ertina i bas ngalaken kiniseran e, la lit jungut-jungut si ndarat arah babah ta, i bas ngenanami kinisern e arus tetap erpengarapen nandangi Kristus maka Kristus mereken gegeh kengasupen man banta i bas kiniseran si i nanami kita e.

I bas ngenanami kiniseran e, arus ka me kita njagai dirinta gelah ula kita papak, njagai pusuh purukuren gelah tetap bersih. Amin gia lit kalak sinterem encikuraki erkiteken kita erkiteken perbahanennta si mehuli erkiteken kita pengikut Kristus, maka mela me akap kalak si encikurki kita e, erkiteken i idahna uga kita tetap bersih, lemah lembut, dingen tetap erpengarapen nandangi Kristus selaku Tuhan. i bas ngenanami kiniseran e, si pehaga Kristus selaku Tuhan, si enggo mate i kayu persilang, keke i bas si mate nari dingen nangkih ku surga kundul arah kemuhen Bapa. Sebabna i bas ayat 17 : Sabab ulin me ngenanami kiniseran erkiteken perbahanen si mehuli, adi kin enda sura-sura Dibata, asangken erkiteken perbahanen si jahat.

ü  Ayat 18-19 : “Kalak bujur mate guna kalak perdosa”

I bas pertibi enda, lenga pernah lit si idah ntah pe si begi lit kalak bujur mate guna kalak si perdosa, maksudna kalak mehuli mate guna kalak si erbahan jahat. Si enda manusia labo ngasup ngelakokenca. Tapi lit sada kalak bujur, Ia ngenca, Jesus kalak bujur, Ia mate guna kalak si perdosa, i bas kematenNa, sekali ngenca Ia mate. Ia mate secara daging, tapi ipegeluh secara Kesah Si Badia. Ia mate gelah manusia banci rembak ras Dibata. Ia nge si mabai manusia guna rembak ras Dibata. Janah i bas kuasa Kesah Si Badia e, Ia lawes meritaken Berita Si Meriah ku belang-belang doni enda. Gelah kerina kalak si tertaban banci pulah. Ia enggo mate, mate guna manusia, Ia ka pe si mabai kita rembak ras Dibata. Patut me Ia i pehaga selaku Tuhan. sebab, Ia ngenca ngasup ngelakoken si bagenda rupa. Pehagalah Ia selaku Tuhan.

ü  Ayat 20-22 : “Kalak si enggo i peridiken i selamatken bage pe ngenanami kegeluhen si mabru”

Lit kiasen si tersurat i bas ayat 20-22, eme lakon peridin. I turiken maka nai Dibata nelamatken Nuh ras kerina isi jabuna arah banjir simbelin. Genduari perpulungen Dibata simbaru, eme kalak si erkiniteken nandangi Kristus, i selamatken alu peridiken. Lakon Peridiken ngingetken perpulungen kerna karya penyelamaten Dibata. Lakon Peridin enda, e me padan si ibahan nandangi Dibata alu pusuh peraten si bersih. Lakon Perdin enda pe erkesinambungen ia i bas penyelamaten si i lakoken Jesus i bas Ia enggo mate janah enggo keke i bas si mate nari. Kalak si enggo i selamtken, arus lit perubahen i bas geluhna. Ia harus ngenanami kegeluhen si mbaru, nadingken kegeluhen si ndekah (Bd. Joh. 3:1-13 kerna percakapen Jesus ras Nikodemus). Kegeluhen si mbaru eme kegeluhen i bas Kristus (Bd. Ep. 4:17-32). Kristus si enggo lawes ku surga kundul arah kemuhen Dibata. Ia si merentah subuk nandagi malekat-malekat ras penguasa-penguasa bage pe gegeh si debanna.

 

III.   Pengkenaina

Kerina kiniseran ibas kebenaran, kesetiaan, ras kinipaguhen ibas ndalanken  perintah Dibata me sierbahansa kerina salih jadi keriahen. Arah kerina perbahanen Dibata ibas kegeluhenta kita wajib Mpehaga Kristus e selaku Tuhan ras Juruslamatta. Cara terbaik guna mpehaga Kristus eme alu memiliki komitmen si la baci goyah ibas ugapape kiniseran sinihadapi kita ibas kegeluhenta, terkhususna ibas mpermuliaken gelar Dibata

Mari, genduari nari kita kerina harus tetap megegeh ngalaken kiniseran ibas ibas ndalanken kebenaren.  Marilah kita siap letih, lesu, sakit, tersiksa saat kita mengikuti kegiatan untuk membesarkan dan memuliakan nama TUHAN YESUS. Sebab kiniseran sinihadapi kita erkiteken perbahanen simehuli lit ulih latih si ibreken Dibata man kalak si setia man BaNa.

Mari sibenaken alu konsisten ibas mpermuliaken ras mpehaga gelarNa si nggo mereken keleng ateNa man banta. Minggu Passion, Jumat Agung, Paskah, seh ku KenangkihenNa ku Surga, eme bukti si tuhu-tuhu janah tesurat ibas pustaka Sibadia terjadi ibas kegeluhen manusia paksa si e, Jesus ngenanami kiniseran alu sada tujun eme melalui Dia kita dibenarkan dan mendapat kemuliaan dari ALLAH BAPA DI SURGA. Amin.

 

Vic. Anggianita Br Sembiring