Pengerakut Kiniersadan Bas Jabu

 

Sermon Bahan PJJ 06 – 12 Juni 2021

GBKP Rg. Bambu Raya Klasis Medan Delitua

Nats                : Mazmur 133:1-3

Tema              : Pengerakut Kiniersadan Bas Jabu

  (Budaya/Sangkep Ngeluh)        

I.         Kata Penaruh

Budaya Karo kerna sangkep nggeluh : Sangkep Nggeluh i bas kalak Karo eme, Merga Si lima (Karo-Karo, Ginting, Tarigan, Perangin-Angin, ras Sembiring), Rakut si telu (Kalimbubu, senina/Sembuyak, anak beru), Tutur si waluh (Sembuyak, Senina, Kalimbubu, Puang Kalimbubu, Puang Ni Puang, Anak Beru, Anak Beru Menteri ras Anak Beru Pengapit/anak beru singukuri), Perkade-Kaden sepuluh dua tambah sada (Sembuyak, Senina, senina sipemeren, senina siparibanen, senina sendalanen, senina sepengalon, Kalimbubu, Puang Kalimbubu, puang ni puang, anak beru, anak beru menteri, anak beru pengapit/anak beru singukuri, tambah sada e me teman meriah). Janah i bas sangkep nggelu enda pe lit kuan-kuannen kerna mehamat er kalimbubu, medes ersenina/sembuyak, metami er anak beru. Enda sangkep nggeluh i bas kalak Karo. Enda me si harus si pertahenken selaku kita kalak Karo si erbudaya, si meteh orat, janah guna kiniersadan.

II.      Mpebagesi Pengangkan Kerna Ogen

Masmur 133 sijadi bahan oratenta sendah nuriken kerna pujin singkat kerna ngergai kiniersadan ras keleng ate i bas ersenina. Hal enda banci si abaiken adi kin memang si akap la lit perselisihen antara manusia ntah pe si ersenina/erturang. Masmur 133 enda pengajuk guna nandangi jelma sinterem gelah geluh i bas dame.

Ibas ay. 1 i turiken maka seh kal ulina dingen senangna adi kalak ersenina ersada perarih! Nggeluh i bas kiniersada ertina maka nggeluh i bas nehken kekelengen sada ras sidebanna, saling melayani sada ras sidebanna. Kiniersadan bagepe sada perarih enda nuriken maka enda me sinisuraken Dibata si harus lit i bas diri kalak si erkiniteken nandangi Dibata. (i bas cakap Indonesiana nina “apabila saudara-saudara diam bersama dengan rukun” enda labo ngatakensa maka siersenina enda harus tading sada jabu kerinana, tapi bagin enda nuriken “diam bersama dengan rukun” maka si ersenina enda harus sepengodak-sepengole/ satu hati, satu jiwa, satu kepentingan, janah e guna kemulian Dibata).

Ay. 2 nuriken kerna kiniersadan  bage pe sada perarih e i umpaken bagi minak wangi si meherga, ertina maka kiniersadan e seh kal mehergana dingen perluna. Sebab i bas kalak Israel minak wangi e penting kal guna i pakeken, janah tole pe i turiken maka minak wangi si meherga e i curcukern ku takal Harun (Harun e me sekalak Imam kalak Israel si idah jelma sinterem, aroma minak si i curcurken e teranggeh jelma sinterem, janah Harun ras anak-anakna la banci ngelai Dibata adi lenga i curcuke minakenda ndai. Bageme pentingna minak enda) bage ka me kiniersadan, sada perarih e, reh riahna si akap erkiteken jelma sinterem ngidah kuga kiniersadan si ijalin kalak si ersenina, lebih asa sie maka kiniersadan e, banci i gejapken jelma sinterem bagepe banci i contoh jelma sinterem.

Emaka ay. 3 tole pe i umpamaken ulina ras senangna adi ersenina enda nggeluh ersada perarih bagi embun. Engkai maka kiniersadan ersenina enda i umpaken bagi embun, sebabna embun maba pasu-pasu si melimpah, si tercurah lalana tetesen embun e. Embun menyejukken las si mesangat i bas diri manusia, bagepe embun menyejukken doni enda. Embun la ertima nandangi ise pe, dikenca reh embun e, reh me. Bageka me kiniersadan ersenina harus i cidahken, maka nehken kekelengen e labao harus ertima ise si leben nehken kekelenegn maka si sehken ka kekelengen. I bas kinersadan ersenina enda kekelengen arus leben i bereken. Janahna kelebihen kalak si ersenina ersada perarih  maka i alokenna me pasu-pasu idur Dibata nari (i bas cakap Indonesiana “TUHAN memerintahkan berkat, kehidupa untuk selama-lamanya.” Ngatakenca maka pasu-pasu Dibata e maler nandangi kalak ersenina si ersada perarih ia, janah pasu-pasu e seh rasa lalap i alokenna i bas kegeluhenna).

III.   Pengkenaina

I bas jaman sigenduari melala kal tuhu kalak si ersenina la ersada perarih ia erkiteken sesuatu hal si terjadi i bas jabuna, padahal ibas budaya karo menekan ken pentingna nggeluh ersenina alu sada perarih, sebab seh kal mehergana kiniersadan e, seh kal pentingna nggeluh ersada e.  Janah Tuhan erpadan mereken pasu-pasuNa  man kalak siersenina sada perarih eme kegeluhen si la erkeri-kerina. Kerina kita metedeh nggeluh ersada perarih, baik ibas rumah tangga, Keluarga ras sanggep nggeluhta, ibas masyarakat bagepe ibas gereja. Tapi kinatana melala kal genduari enda perubaten sada ras sidebanna, perkara simbelin ras perkara sikitik si ipebelin. Ijah ije melala perubaten, kekerasen, egois, mementingken diri sendiri, rsd. Emaka ibas keluarga persoalen sikitik pe baci jadi masalah misalna kerna harta warisen banci lanai ate erturang senina, terjadi perang siadun rsd.

Kerina kita ertedeh ate guna ndatken dame, nggeluh sada perarih sebab melala kal ulihna man banta bagepe kalak sideban. Inget maka kita enda kalak si lit adat budayanta si ngatur kegeluhenta, maka kita enda labo nggeluh sisada kita perlu sangkep nggeluh, si jadi temanta ibas doni enda. ersadalah arihta, sikeleng-kelengen, sisampat-sampaten.