Lau Maler (Kej. 2:10-13)

 

Sermon Bahan PJJ 21-27 Mar et 2021

GBKP Rg. Bambu Raya Klasis Medan Delitua

Nats    : Kejadin 2 : 10-13

Tema  : Lau Maler (Hari Air Sedunia)

I.                   Pendahuluan

Hari air sedunia iperingati setiap tahunna, tepatna ibas tanggal 22 Maret ibanaken ibas tanhun1993. Peringeten kerna hari lau enda benaken bas Sidang umum PBB ke-47 i Rio De Janeiro, Brazil. Peringeten enda isepakati gelahna masyarakat meteh kerna pentingna lau bersih ras pengelolaan sumber lau bersih si berkelanjutan alu ngkurangi penggunaan lau keran alu berlebihan. Siklus malerna lau ibenaken ibas udan nari, nusur ku taneh, nusur ku lau ras seterusna. Janah 97% lau si lit ibas doni enda eme air asin (air laut), emaka 2% eme lau siberbentuk bongkahen es, emaka 1% ngenca lau tawar sibanci ipake ibas kegeluhen doni enda.

Lau eme sumber daya alam si sangat penting man makhluk hidup si ibutuhken tiap wari, subuk man konsumsinta bagepe keperlun sideban. Janah 80% kulanta eme lau. Banci sibayangken adi doni enda kekurangen lau bersih, banci jadi kerina makhluk hidup erlumba ndatken lau gelah tetap bertahan hidup.

II.                Isi

Kitab Kejadin nuriken kerna mula-mula doni enda i tepa Dibata. Kitab Kejadin enda ka pe sada kitab kerna kesaksin kiniteken si isina nuriken kerna ise Dibata ras uga Ia erdahin ibas kegeluhen manusia menaken doni enda i tepaNa. Kitab Kejadin enda pe nuriken kinimbisan Dibata nandangi kerina tinepaNa. Kejadin 2 enda pe nuriken Dibata njadiken doni ras isina. Terkusus ibas Kejadin 2:8-25 kerna Dibata njadiken manusia ras i tamakenNa i peken Eden.

Kejadin 2:10-13 si jadi bahan PJJ-nta nuriken kerna lau mbelin si maler i peken Eden. Kenca lau ndai ngepari peken Eden,  maka lau simbelin ndai terbelah menjadi 4 bagin lau maler. Gelar lau maler enda eme:

1.      Lau Pisun, lau pison e maler ngkeleweti negeri Hawila ingan emas lit. Janah enas ibas negri Hawila si ipaleri lau Pisun enda ndai seh kel mehulina, bagepe ije lit ka si merim-merim (damar bedolah) bage pe batu permata simeherga.

2.      Lau Gihon, lau enda paleri seluruh daerah Kush i sekitaren peken Eden. Enda nuduhken maka, lau seh kel perluna guna mereken kegeluhen nandangi tinepa Dibata. Teridah uga kinimbisan Dibata guna njadiken doni enda ertorosen.

3.      Lau Tigris, lau e maler arah Timur negeri Assur.

4.      Lau Eprat, membentuk lembah-lembah lau maler si mejile i daerah Mesopotamia.

Keempat lau si isekitaren peken Eden berfungsi guna njadiken kerina mehuli i daerah-daerah si i palerina. Sebab lau eme kebutuhen utama si i butuhken manusia. Labo hanya manusia si membutuhken lau, tapi tinepa Dibata sideban ka pe membutuhken lau. Si jelas ia lau si meciho dingen bersih guna pertumbuhen tinepa Dibata. Kinatana maka kalak banci ngasup la man 4 wari ndekahna, tapi la ngasup adi la minem, mis nge kari dehidrasi janah teridah la cerah ayo e.

Adi siperdiateken kerna bahan oraten PJJ-nta enda, teridah maka Dibata njadiken lau man guna tinepa-Na, nggo mehuli kerina iaturkenna perpalirna, gelah alu bage penggunaan lau pe banci ifungsiken alu mehuli ras merata ku kerina ingan, bagi pembagian sibahan Dibata ibas peken Eden. Si jadi penungkunenna eme, kai nge maksudna ituriken kata enda ibas pustaka bage pe seh man banta ibas paksa genduari enda? Tujunna eme:

1.      Kai si harus ilakoken kalak Israel guna njagai si nggo mehuli ijadiken Dibata

2.      Ngingetken mulihi maka bangsa Israel eme pilihin Dibata, guna mpekena-kena tinepana.

3.      Mengatur kebutuhen kegeluhen segelah mehuli seh ku generasina. Arapen penulis segelah kiniulin si nggo ibahan Dibata e seh min igejapken ku generasi selanjutna.

Ibas tujun penuriken enda tentuna eme guna kiniulin kegeluhen manusia. Sebab sura-sura Dibata ibas kai si nggo ibahanNa mehuli e, bage ka min ijaga manusia gelah tetap mehuli.

 

 

 

III.             Kesimpulan

Ibas kita kalak Kristen, lau eme simbol kegeluhen ras keselamaten. Kita peridiken alu lau, mujizat Yesus si pertama pe erkawiten ras lau (Yesus nalihken lau jadi anggur), janah si mbelinna eme Yesus nuriken maka Ia me ulu lau kegeluhen (Joh. 4:14). Emaka lenga bo lit hal sideban si banci nggantiken posisi lau ibas kegeluhenta.

Alu persinget kata Dibata ibas oraten PJJ-nta enda, kita ipersingeti maka kita selaku pilihen Dibata lit piga-piga hal si perlu jadi gelementa ibas njagai salah sada kebutuhen pokokta eme:

1.      Njagai si nggo mehuli ijadiken Dibata.

2.      Inget, maka kita enda me si jadi teman (aron) Dibata guna mpekena-kena tinepa-Na.

3.      Siatur kegeluhenta. Sipekena-kena ulu ras perpaler lau alu mehuli, gelah mehuli perpalerna. Janah banci mengurangi resiko banjir.

Alu tanggung jawab si enda, maka kita nggo ikut muat bagin guna tetap njaga/melestariken kebutuhenta bage pe tinepa Dibata khusuna mengelola lau. Bujur

 

“Air awal mula kehidupan, menjaga sumber air sama dengan menjaga kehidupan. Selamat Hari Air Sedunia”

Vic. Anggianita Br Sembiring, S.Th