Teptep Wari Erberita

 

Sermon Bahan PJJ 28 Maret - 3 April 2021

GBKP Rg. Bambu Raya Klasis Medan Delitua

 

Nats    : Mazmur 19:1-9

Tema  : Teptep Wari Erberita (Perayaan HUT Kategorial)

 

I.                   Pendahuluan

Kai buktina Dibata e lit? penungkunen sibagenda, rusur menjadi topik hangat ibas diskusi keagamaan. Penungkunen e pe labo terjeng penungkunen si muncul arah kalak si la tek maka Dibata e lit, tapi penungkunen sibagenda rupa pe muncul ka ibas kalangan kalak si tek maka Dibata e lit. Logika berfikir guna jabab penungkunen sibage eme kap : kerina ciptaan e lit perban lit si ciptakensa janah semakin rumit suatu ciptaan maka semakin hebat ka siciptakensa. Logika sie lah si ipake pemasmur ibas merenungken keberadaan Dibata.

 

II.                Isi

Kitab Masmur eme kitab terpanjang i bas Pustaka Ibrani. Kitab enda risiken kerna ende-enden pujin, pertoton mindo penampat Dibata, bagepe kerna kiniteken nandangi Dibata. I bas kitab enda ka pe ituriken erbage-bage penggejapen si lit i bas manusia, eme ceda ate ras keriahen ukur, kiniteken ras keraguan, pusuh siterluka bagepe teralemi, pengarapen ras putus asa, kemarahan ras ketenangen, bagepe sura-sura erbalas dendam ras pengalemi.

Masmur 19 eme masmur Daud si memiliki dua garis besar. Garis besar sipemena lit ibas ayat 2-7, si isina eme kerna Daud memuji Dibata erkiteken kinibisanNa si tergambar arah tinepaNa i doni enda. Garis besar sipeduaken lit ibas ayat 8-15 ija Daud memuji undang-undang Dibata si benar, adil, ras mereken kepentaren nandangi kalak si tek.

Bahan oratenta eme ayat 1-9, ija ayat 2-7 masuk kubas garis besar si pemena ija Daud mengungkapkan kekagumenna nandangi isi semesta enda terlebih ia mengagungkan Dibata, sebagai pencipta. Ibas ayat 2-3, Daud nuriken alu tangkas maka doni enda ras isina eme bukti kiniliten Dibata siigambarken arah kemulian ras perbahanen Dibata si luar biasa ibas tinepa-Na, janah tep-tep tinepa e pe erberita kerna kehebaten Dibata alu carana masing-masing. Ibas ayat 4-7 ikatekan, maka tinepa e labo memang melasken kata bagi manusia, tapi sorana (gema : kumandang, gaung, bunyi) erdengung (terpancar) i belang-belang doni enda. Uruk-uruk, deleng-deleng, lawit si mbelang, langit ras isina, sungai-sungai yang mengalir, hutan ras tumbuhen, rubia-rubia, kerinana berharmonisasi, sahut-menyahut ibas memberitaken ras muji-muji Dibata si enggo nepa ia.

Siselanjutna ayat 8-9 enda masuk kubas garis besar sipeduken ija Daud memuji undang-undang Dibata. Ikatakenna maka undang-undang Dibata e serta (sempurna) kap. Undang-undang Dibata mereken gegeh simbaru, penegertin man kalak si kurang pentar, janah keriahen nandangi kalak si ngikutkenca, enda me si perlu harus siberitaken.

Tema PJJ-nta minggu enda eme Teptep Wari Erberita erkawiten ras HUT kategorial si lit ibas GBKP. Ibas bahan oratenta ndai teridah uga pemasmur pe erberita kerna kemulian Dibata, janah uga pemasmur nerangken maka doni enda ras isina pe ikut erkumandang memuji Dibata selaku sinepasa alu carana masing-masing. Kita pe termasuk tinepa Dibata, bahkan kita jauh lebih sempurna ijadikan Dibata asangken tinepaNa si deban.  Arah sie kita selaku kalak si erkiniteken ertanggung jabab ibas mberitaken kemuliaan Dibata arah kerina dampar geluhta. 

Erkawiten ras perayaan HUT Kategorial I GBKP. Pelayenen i gerejata GBKP menyentuh ku seluruh lapisen perpulungen subuk Mamre, Moria, Saitun, Permata, ras KAKR. Alu tujun gelah baci ersaksi ras erberita kerna perbahanen Dibata ibas kategorialna, janahkerina ngawani perpulungen bertumbuh dewasa kinitekenna ibas kelompok-kelompok kategorialna ras baci muat bagin ras berperan ibas pelayanen i tengah-tengah gereja.

 

III.             Kesimpulan

Penungkenen kerna kai buktina Dibata e lit? nggo tangkas terbukti arah tinepa Dibata ibas doni enda, terlebih-lebih arah kita manusia singgo itepa-Na sindauh lebih sempurna ijadikan-Na asangken tinepa-Na si deban.  Arah sie kita selaku kalak si erkiniteken ertanggung jabab ibas mberitaken kemuliaan Dibata arah kerina dampar geluhta. Kita eme perkakas Dibata, si itepa-Na guna kemulian gelar-Na. Kita me gambaren kemulian, kehebaten, ras keleng ate Dibata e, janah kita me situhuna kandu-kandu Dibata, ingan Dibata nuriken kerna keleng ate-Na ras pandan-Na sitetap. Adi sisadari kerna si e, tentuna lanai bo lit alasenta la setia man Dibata. Emaka mari kita turut berharmonisasi ras tinepa sideban ibas mempermuliaken Dibata bagepe erberita kerna Ia.

 

   Vic. Anggianita Br Sembiring, S.Th