Pujilah Tuhan Alu Landek Ras Rende

 

Sermon Bahan PJJ 20 – 26 Juni 2021

GBKP Rg. Bambu Raya Klasis Medan Delitua

Nats                : Mazmur 149:1-3

Tema              : Pujilah Tuhan Alu Landek Ras Rende

  (Budaya/Kreatif Inovatif)        

I.         Kata Penaruh

Kalak Kristen e me kalak si dem alu ende-enden pujin man Dibata. Nen saja i bas kerina perjumpan-perjumpan kalak Kristen, i bas suasana erceda ate seh ku suasana meriah ukur, kerinana dem alu ende-enden pujin man Dibata. Ertina i bas tradisi (budaya) kalak Kristen enggo semal mpenangkih ende-enden pujin man Dibata, tapi labo saja erkiteken enggo semal, enggo tradisi si ipesusur turun-temurun, tapi intina erkiteken rende muji Tuhan e salah sada perentah Dibata si arus ilakoken kalak si tek, janah Dibata si isembah kita e me Dibata si memang layak ipujiken erkiteken perbahanen-perbahanenNa si mbelin i bas kegeluhenta.

II.      Mpebagesi Pengangkan Kerna Ogen

Masmur 149 enda eme masmur pengajuk guna nggejapken kuasa, kekelengen ras perkuah ate Tuhan si enggo icidahkenNa man bangsa Israel. Penginget guna nembah ras muji Tuhan si enggo mereken kebutuhen-kebutuhen manusia baik kebutuhen fisiologis (Primer), kebutuhen rasa aman ras perlindungen arah serangen imbang-imbang Israel paksa si e, kebutuhen sosial erkiteken Tuhan enggo njadiken Israel jadi sada bangsa.

Ay. 1 : Pemasmur ngajuk guna mpenangkih ende-enden simbaru janah muji Tuhan i tengah-tengah perpulungen si tutus. Engkai makana pemasmur ngajuk guna muji Tuhan i tengah-tengah perpulungen si tutus..? Enda nuduhkenca maka si khususna guna ngendeken ende-enden pujin man Tuhan, eme perpulungen si tutus. I bas kinitutusen perpulungen ersembah man Tuhan, teridah keriahen ukur perpulungen i bas ngendeken ende-enden man Tuhan. Lebih asa si e, maka perpulungen si tutus jadi contoh nandagi kalak sideban. Ende-enden pujin man Tuhan tanda keriahen ukur kalak si tutus ersembah/erkiniteken man Tuhan, bagepe ende-enden pujin e guna mpermuliaken gelar Tuhan.

Ay. 2 : I bas ayat enda pemasmr secara khusus ngajuk bangsa Israel guna muji Tuhan. Engkai maka harus Israel..? engkai maka labo bangsa-bangasa sideban si enggo i taluken Israel..? Pemasmur ngingetken secara khusus man Israel, erkiteken Israel me bangsa pilihen Dibata. Selaku bangsa pilihen Dibata, harus me bangsa e muji Dibata alu meriah ukur, erkiteken Dibata si nepa ia. Dibata si milih Israel jadi bangsa pilihenNa. Dibata enggo mbebasken ia ibas perbudaken nari, Dibata enggo mabai Israel ku taneh perpadanen, janah Dibata enggo ngelakoken kerina simehulina nandangi bangsa e. la lit alasen guna la muji Dibata. Rende ersurak alu keriahen ukur, rende ersurak erkiteken perbahanen Dibata simbelin.

Ay. 3 : I bas kebiasaan kalak Israel, guna mpenangkih ende-enden pujin harus lit alat musik si mengiringisa (Msm. 33:2-3, 71:22 dsb.). Bagepe i bas ayat 3 enda, i turiken maka muji gelarNa alu landek ras malu gendang bagepe ngkuit kulcapi. Landek bagepe ermusik cara sideban guna muji Tuhan. Ende-enden pujin i gabungken alu landek ras alat musik tuhu berbeda kal keriahenna. Meriah ukur adi rende i iringi alat musik, reh riahna ka ukur adi banci landek i bas muji Tuhan. Enda tradisi kalak Israel simehuli i bas ia muji Tuhan.

 Tentuna arah sie teridah maka kengasupen bangsa Israel i bas ia “Landek dingen rende alu dem pengataken bujur” enda lit latar belakangna. Dinamika kegeluhen kinitiken bangsa enda memang labo mulus-mulus saja. I bas piga-piga paksa lit masana bangsa Israel terpuruk i bas kiniteken, bahkan erlawanen ras sura-sura Dibata. Tapi bangsa Israel pe ngidah maka amin gia megati ia ngelakoken hal si la ngena ate Dibata tetap ialo-alo Dibata alu kekelengen bahkan alu mereken kemenangen-kemenangen man bangsa e i bas ngalaken imbang-imbangna. Kengasupenna muji ras nembah Dibata e erkiteken penggejapenna (iman kinitekenna) ngidah alu tangkas maka Dibata si sembahna e eme Dibata si enggo mereken keselamaten, kebutuhen ras kemenangen bas geluhna.

 

III.   Pengkenaina

Rende ras landek enda adi sigargari pe i bas budaya sideban, enda simbol-simbol perasaan, ntah pe luapen perasaan si nehken sada pesan “keinginen guna ngelakoken sada tindaken nyata” sebagai respon i enggo ialokenna. Temata sendah  situhuna pe mereken penekanen si seri ras  si e. Landek ras rende enda jadi sada tekad guna ngelakoken sada hal si lebih dari sekedar landek ras rende e. Eme lagu langkah kegeluhen si sentudu ras sura-sura Tuhan, guna muji Tuhan alu landek ras rende. Jilena landek ras rende e tentuna itentuken dem ntah lang kita nggejabken ras ncidahken pengataken bujurta man Tuhan.

Piga-piga semangat siencidahken nilai positif ibas budaya karo sikawiten ras landek bagepe rende eme:[1]

a. Guro-guro Aron, ngajarken uga landek alu sopan-santun ibas kerina ritme endekna (meteh mehangke). Janah ibas ngelakoken guro-guro aron e iperluken persikapen si tutus (latihen, paken.

b. Ergendang, lit pengaturen kerna tegun silandek ibas ergendang. Misalna ibas gendang adat mengket rumah lit silandek tegun sukut, tegun anak beru, tegun kalimbubu ras tegun puang kalimbubu.

c. Tujun ende-enden, ibas kalak karo lit piga-piga jenis lagu rikutken tujunna misalna nuri-nuri, ngerengget sierguna ibas ngajarken, notoken ras ngataken bujur.

d. Alat musik si erbage-bage misalna: sarune, gendang singindungi, gendang singanaki, penganak, gong, belobat, surdam, suling, keteng-keteng, kulcapi. Janah alat enda pe ijaga uga memeliharasa gelah ula ceda ras cara makesa alu mehuli.

---

[1] Bahan sermon Klasis Medan Delitua