Meteh Si Pentingna I Bas Kegeluhen

 

Sermon Bahan PJJ 18 - 24 April 2021

GBKP Rg. Bambu Raya Klasis Medan Delitua

Nats    : 1 Korinti 13:1-13

Tema  : Meteh Si Pentingna I Bas Kegeluhen

  (sehna berita simeriah man kalak karo)

 

I.                   Kata Penaruh

Kitab 1 Korinti eme kitab si mereken pandangan si jelas man banta kerna erbage-bage persoalan sinihadapi perpulungen si pemena. Persoalen-persoalen si terjadi i tengah-tengah perpulungen Korinti e me kerna perpecahen-perpecahen (1:10 – 4:21),  ras lagu langkah si la mehuli si lit i bas perpulungen (5:1 – 6:20), kerna lagu langkah perjabun (7:1-40), soal-soal penggejapen, aturen-aturen perpulungen, pemere Kesah Si Badia, ras kerna kekeken i bas si mate nari. Binu 13 nuriken maka pemere Dibata si mbelinna man anaj-anakNa e me kekelengen. Ngerana kerna keleng-ate, keleng-ate lit terbagi ibas telu bagin eme: Keleng ate Storge : keleng ate si terbatas hanya i bas anggota keluarga saja, keleng ate eros : keleng-ate nafsu/seksual antara lawan jenis, filia : keleng-ate bersifat persahabatan, ras keleng ate agape : keleng-ate Dibata tak bersyarat.

 

II.                Mpebagesi Pengangkan Kerna Ogen

1 Korinti 13:1-13 simenjadi bahan PJJ-nta enda nuriken kerna keleng-ate, eme:

1)      Ay. 1-3 nuriken kerna : Sia-sia kerina adi lalit keleng-ate

Paulus nuriken nandangi perpulungen i Korinti maka, amin gia beluh ngerana i bas kerina cakap manusia, bagepe i bas cakap malekat, ntah pe lit pemere guna ernubuat ras  amin gia i sumbangken kerina erta-erta guna ndatken kemegahen, tapi adi la lit keleng-ate janah la nehken keleng-ate nandangi kalak sideban, la lit ertina kerina si enggo i lakoken e. I turiken maka  kalak si bage bage gung erbulnang ntah pe penganak si erdeping, ertina hanya sebagai pelengkap suara gelah meriah saja tapi la lit ertina.

2)      Ay. 14-7 nuriken kerna : Bukti keleng-ate

Kalak si lit i bas ia keleng-ate maka kalak si bagenda arus ia megenggeng, mehuli, la percian, la meganjang ukur, la sombong, la mekarus, la ncariken untung man bana saja, la pergelut, la ngkira kesalahen kalak, la meriah ukurna adi kalak erbahan si jahat, ermeriah ukur i bas si benar, ngasup nggengken kai-kai pe, erpengarapen dingen saber i bas kai-kai pe, janah tek maka lit si mehuli i bas kerinana, enda me bukti kalak si erkeleng-ate.

3)      Ay. 8-10 nuriken kerna : Kekelengen lit lalap

Paulus pe nuriken maka keleng-ate e la erkeri-kerin. La bagi pemere-pemere sidebanna si i berekan Kesah Si Badia man mansia, janah pe keleng-ate e i sempurnaken Dibata gelah tetap serta.

 

 

4)      Ay. 11-13 nuriken kerna : Telu hal si penting

Tupung kita danak-danak denga kita bagi danak-danak, tapi Dibata pagin erbahansa maka perukuren si sanga danak-danak ndube i sempurnaken Dibata. Janah kalak si erkiniteken man Tuhan arus lit i bas ia telu hal si penting eme, kiniteken, pengarapen, ras keleng ate. Tapi si pentingna i bas si telu hal si penting enda eme keleng-ate. Keleng-ate guna engkelengi kalak sideban. Matius 22:37-40 “Kelengilah Tuhan Dibatandu asa ukurndu, asa tendindu, dingen asa gegehndu lit. Enda me perentah si mbelinna dingen si pentingna. Si peduaken bali ras si ndai e me. ‘kelengilah temanndu manusia bagi kam ngkelengi dirindu.’ Enda me tugas ras tanggung jabab kalak si erkiniteken man Dibata.

 

III.             Pengkenaina

Keleng-ate sada hal si perlu kal guna lit i bas diri kalak si erkiniteken nandangi Kristus. Engkai maka bage, erkiteken Kristus enggo leben nehken keleng ateNa nandangi manusia. Emaka i bas 1 Korinti 13:1-13 enda i tangkas i turiken maka keleng ate e pemere Kesah Si Badia.

Sekalak pendeta pernah ngataken man kami maka lit 3 cara kalak engkelengi eme:

1. Engkelengi erkiteken

Nehken keleng ate erkiteken lit hal-hal tertentu, ntah kin erkiteken ia kade-kade, ntah kin erkiteken ia atasenta, ras melala sidebanna. Janah keleng ate erkiteken e, banci erbahansa kecewa.

2. Engkelengi gelah

Kerna nehken keleng ate gelah, si enda melala terjadi guna ndatken pujin, gelah i pandang kalak mehuli, gelah, gelah, janah si enda pe bali bagi keleng ate erkiteken ndai, banci erbahanca kecewa.

3. Engkelengi amin gia

Tapi, adi kerna nehken keleng ate amin gia, enda si agak mesera si dalanken, sebabna kita nehken keleng ate amin gia. Ertina maka, amin gia lit kalak erbahan ukurta segat tetap harus nehken keleng ate, amin gia erbahan kecewa tetap nehken keleng ate. Janah nehken keleng ate si amin gia enda, la erbahan kecewa sebabna enggo si baleng-balengi rukur. Janah si keleng ate amin gia enda me harus sidalanken selaku kalak si erkiniteken.        

Ncakapken keleng-ate seh kal mesunahna, tapi guna ngaplikasikensa seh kal meserana. Tapi selaku kalak si erkiniteken arus ngasup jadi teladan i bas nehken keleng-ate e, gelah ola bagi kuan-kuan kalak Karo “Adi cakap saja labo lako” nina. Mari berproses kita guna nehken keleng-ate. Dibata Simasu-masu!!!

 

Vic. Anggianita Br Sembiring, S.Th

God Bless JJJ